Gratin með eggaldini og kurbit

Við útbjuggum þennan rétt í fyrsta skipti verslunarmannahelgina 2007 með Ásdísi og Togga. Höfðum það huggulegt heima við á meðan þjóðin var á faraldsfæti. Rétturinn kom okkur öllum verulega á óvart. Hann var bragðmildur en samt fullur af alls kyns bragði. Þar spilar edikið stórt hlutverk ásamt parmesanosti í sósunni. Einnig er gaman að finna seigt eggaldinið og kúrbítinn undir tönn. Uppskriftin er fengin úr bókinni "Meðlæti" (á dönsku "Tilbehör") eftir Charlotte Grönlykke. Góður matur sem meðlæti en einnig stendur vel fyrir sínu einn og sér (ásamt salati).

GRATÍN MEÐ EGGALDINI OG KÚRBÍT (bls. 60)

1. Hitið ofninn í 185 gráður
2. Einn stór laukur er skorinn og glæraður á pönnu í ólifuolíu. Látinn til hliðar.
3. Eitt stór eggaldin er skorið í teninga og hitað á pönnu upp úr slatta af ólifuolíu, ca. 5 mín.
4. Kúrbít (einn stór eða tveir litlir) er bætt við, skornum í sneiðar. Mallar saman í 10. mín.
5. Kúrbíts/eggaldinsblöndunni er blandað við laukinn og hrært saman. Saltað og piprað.
6. Þessari blöndu er hellt í smurt eldfast fat.

7. Fimm egg eru þeytt í stórri skál.
8. Matskeið af olíunni er bætt út í ásamt 1 dl. af balsamediki.
9. Rifnum parmesanosti (ca. 150-200 g.) er bætt út í eggjablönduna. Saltað og piprað.

10. Eggjablöndunni er hellt yfir grænmetisblönduna í eldfasta fatinu.
11. Álpappír er settur yfir fatið svo að maturinn bakist jafnt (en ekki of mikið að ofan) og sett inn í forhitaðan ofninn.
12. Eftir um það bil 35-40 mínútur er fatið tekið út, osti (frjáls val) stráð yfir (um það bil 50-100 gr.).
13. Núna fer maturinn aftur inn, án álpappírsins, og hitað í 15 mínútur í viðbót. Undir lokin er í lagi að setja á "grill" til að maturinn gyllist að ofanverðu.

Borið fram sem meðlæti eða sem aðalréttur (og þá mæli ég með kartöflusalati (sem fæst úti í búð) sem meðlæti ásamt fersku salati þar sem tómatar eru aðaluppistaðan).

p.s. Bókin talar um að maturinn bakist í ofninum í vatnsbaði (í lið 11-12) en mér finnst það óþarfi. Kannski verður eggjahræran þéttari og jafnari þannig, en það eru smámunir.

Eggaldin í ofni

Eggaldin í ofni
Originally uploaded by Steiniberg.

Þennan rétt fundum við Vigdís í fylgiblaði Moggans (Lifun) í byrjun mars 2005 og vorum fljót að prófa hann. Hráefnið er svolíið dýrt og maturinn afar fituríkur (mikil olía og ostur) en að öðru leyti er þetta hentugur og þægilegur réttur, svo ekki sé minnst á gómsætur. Þetta er eggaldinréttur með parmesanosti og mozzarella í ofni ásamt tómötum og ólífuolíu.

Ég byrja á því að smyrja eggaldinsneiðar (skornar langsum) með ólífuolíu. Þetta er svolítið löðrandi vinna þannig að mér finnst ágætt að gera það á kaldri pönnunni sem verður hvort eð er olíuborin. Þetta er lang snyrtilegast svona. Síðan er eggaldinið hitað upp úr olíunni þar til aldinsneiðarnar eru fallega gullbrúnar. Þetta má þess vegna gera með góðum fyrirvara snemma dags og halda áfram seinna um daginn og leyfa eggaldinsneiðunum að sjúga betur í sig olíuna (en það er ónauðsynlegt samt sem áður).

Eftir þetta er ofninn hitaður og þá er aðeins lítilræði eftir. Sneiðunum er raðað í eldfast fat, saltað og piprað, maukuðum tómat úr dós dreift yfir ásamt vænni lófafylli af grænum ólífum (skornum í tvennt). Yfir þetta er fínt að rífa parmesanost, skera svo mozzarella með hníf í þunnar sneiðar og raða yfir og inn í ofn. Það er allt og sumt.

Uppskriftin hljóðar reyndar upp á tvö lög af öllu gumsinu en þetta er samt mjög sveigjanlegur réttur og eflaust hægt að nota sem grunn í ýmislegt. Aðalatriðið er að olíubera eggaldinið vel - og nota gott hráefni. Þá getur þetta ekki klikkað. Það gerir líka heilmikið fyrir réttinn ef maður tálgar parmesan yfir í litlum flísum ásamt því að rífa hann. Það er girnilegra að finna hann undir tönn öðru hvoru.